فانتازيا 2500م
تأليف : محمد ابراهيم اسحاق
في المستقبل عندما يكون هناك بشر آليين , و عندما يتعطل أحد أبناءك أو أصدقاءك الآليين , ستذهب الى الباشطبيب و ستقول :
- الزول ده رَكِب ليهو مخ 40 قيقا .
الباشطبيب حيسألك :
- داير راماتو كم ؟
انت حتقول :
- خليهو 512 عشان ما يفهم سريع.
الباشطبيب حيقول ليك :
- دايرو متصِل بالنت دائماً و لا أحياناً ؟
انت حتفكِر , لو بقى مُتصِل دائماً معناها حيبقى مُواكِب , و حيبقى أذكى مِنك , و حتقوم تقول:
- أفْصِل منو النت .
الباشطبيب حيندهِش و يسألك :
- لكن كيف زول بدون نت , لازم يا نت يا بلوتوث ..
انت حتقوم تفكِر شُوية و تَحُك راسك و تقول :
- خلاص رَكِب ليهو بلوتوث .
يقوم يعالِج ليك زولك , أقصُد يبرمجو ليك ...
***
و بعد يومين تاني حتجِي راجع للباشطبيب , تقول ليهو :
- الزول ده بطاريتو كعبة , ياخ ما بتِم معاي ساعتين !
الباشطبيب حيأنِبَك :
- انت أكيد بتستخدمو غلط !
انت حتقول بضيق :
- و الله غير الونسة معاهو ما مُشغِلو أي حاجة , خاتيهو عاطل ساي ..
الباشطيب يسأل زولك العيان :
- آها حيرتنا .. مُشكِلتك شنو ؟
زولك حيقول للباشطيب :
- الزول ده مُستعمرني و مُضطهدني و بستفِزني ...
انت حتغضب و تقول لزولك :
- هو إنتَ يستفِزُو فيك شنو , هو انت تَسْوّى حاجة عندي لامن أنا استفِزك و لا اضطهدك ..
زولك حيستنجد بالباشطبيب و يقول ليهو :
- شايف يا دكتور , ده تعاملو معاي , دايماً شايف نفسو أعلى مني , دايماً شايف نفسو الأفضل و خاتيني درجة تالتة , مع إنه محتاج ليّ , أنا ذنبي شنو ؟
الباشطبيب حيطردكم الاثنان بغضب :
- اذهبا .. أنا استطيع علاج أي مرض إلا العُنصرية .
تــــــــمـــــت
